عملت تورتة عيد ميلاد بسيطة تقدرى تعمليها فى اى مناسبة بسهولة
مكونات الكيكة الاسفنجية:
5 بيضات كبار
فانيليا
كوب سكر
2 كوب دقيق ناقص معلقتين كبار
ملعقة ونصف صغيرة بيكنج بودر
2 ملعقة كبيرة كاكاو خام
(وطبعا الكيكة الاسفنجية مفيهاش حليب او اى مادة دهنية زى زيت او سمنة)
مكونات الحشو:
800 جرام شوكولاته مقطعة
400 مللى فريش كريم
مكونات التغطية:
كريم شانتى وهنحتاج لعمله:
كوب ونصف كريم شانتى خام
كوب ونصف حليب بارد
5 ملعقة كبيرة سكر بودرة
2 ملعقة كبيرة كاكاو خام
جناش وهنحتاج:
450 جرام شوكولاته مقطعة
200 مللى فريش كريم
وانا حبيت اعمله تقيل شوية بس الاساسي فى الجناش ان كمية الشوكولاته تبقى ضعف كمية الكريمة
وللتزيين:
كريز احمر
شوكولاته احجار
شوكليت شيبس
لولى الوان
لون طعام دهبى
وطبعا التزيين حسب رغبتكم
الطريقة:
اول حاجة هنعمل الكيك
فى اناء هنحط البيض والفانيليا
ونضربهم بمضرب البيض لمدة متقلش عن دقيقتين
وهيعملوا رغاوى ونضيفلهم كوباية السكر
ونضربهم على اعلى سرعة لمدة متقلش عن 10 دقايق متواصل
لغاية الخليط مايبقى لونه فاتح ويتكاثف وكريمى ويعمل علامة زى الشريط او رقم 8 لما نشيل من عليه المضرب
وهنضيفله الدقيق والبيكنج بودر والكاكاو بعد ماننخلهم
وهنضربهم بالمضرب لغاية ماتتجانس المكونات وهنحط الخليط فى صينية مبطنة ورق خبز مقاس 40 وممكن حجم صينية اصغر عادى
ودخلتها فرن حرارته منخفضة لغاية ماإستوت واختبرتها وطبعا كل فرن بيختلف عن التانى عشان كده مكتبتش درجة حرارة الفرن
ودى اسهل طريقة ممكن تعملوا بيها الكيكة الاسفنجية فى البيت وبيبقى طعمها حلو جدا زى اللى فى المحلات
وانا عملت 3 كيكات فهكرر اللى فات مرتين وطبعا نقدر نعمل كيكة واحدة ونقسمها ل3 طبقات بس انا معنديش صينية الحجم ده غير صينية السويسرول فمكانتش ينفع تاخد كمية اكبر من دى
وهنحط الكيكات لى ورق خبز ونحطهم فى مكان بارد ممكن خارج التلاجة عشان احنا فى شتا
وهنعمل جناش الحشو هنحط الفريش كريم فى كسرولة
ولما يغلى نطفى ونضيفله الشوكولاته المتقطعة واستخدمت
الشوكولاته دى
ونقلبهم لغاية ماتدوب الشوكولاته
وهندخله التلاجة عشان يجمد وتانى يوم طلعته عشان ابدأ احشى الكيك لقيته جمد والمرحلة اللى وصلها دى هى اللى بنعمل منها التروف الفرنسى(ان شاء الله هعمله فى موضوع منفصل)
وطبعا لإن الجناش جامد فمش هعرف استخدمه بالشكل ده فضربته شوية بالمضرب عشان يلين
وبدأت احشى الكيكة
ووزعته عليها بالتساوى
تاااااااااااااابعونى
هكمل المشاركة الجاية
وهنساوى الأطراف بالسكينة
وهنجهز الكريم شانتى عشان نغلف الكيك
فى اناء هنحط كل المكونات مع بعض
ونضربهم بالمضرب لغاية ماتتجانس المكونات والخليط يبقى متماسك
ونغلف الكيكة ونساويه عليها كويس
ونجهز جناش التغطية هنعمله زى ماعملنا جناش الحشو بس كل الفرق ان الكمية اقل ومش هنسيبه يجمد
فى كسرولة هنحط الفريش كريم
ولما يغلى نطفى النار ونضيفله الشوكولاته المتقطعة
ونقلب الشوكولاته لغاية ماتدوب
ونسيب الجناش يهدا 5 دقايق وننزل بيه ع الكيك
لغاية مايغطى كل الكيكة والجوانب ونسيبه يبرد ويثبت ع الكيك
ونكمل بقية التزيين
هنسيح شوكولاته على حمام ميه ونفردها ع ورق خبز
وجبت شكل مربع وضغطت بيه ع الشوكولاته وهى لسه طرية وشلته لما نشفت عشان يبقى عندى شكل مربع اكتب عليه
وعملت اشكال بالبلاستيك من الشوكولاته عشان ازين بيها التورتة من فوق
وزينت التورتة ع الوش حطيت اشكال الشوكولاته وكريز وشوكليت شيبس واللولى وشوكولاته احجار وفى الجناب عملت خطوط رفيعة بالكريم شانتى وحطيت بينهم شوكولاته احجار ورشيت عليهم لون الطعام الدهبى
والكيك اللى قطعناه لما ساوينا التورتة طبعا مرمتهوش ضفتله الجناش والكريم شانتى اللى زادوا وخلطهم مع بعض وعملت كيك بوبس عشان مفيش حاجة تترمى من المواد اللى هتزيد عندنا
وده شكل التورتة النهائى
يارب تكون عجبتكم